இனி கைபேசிகளுக்கு சிம் கார்ட்டே தேவையில்லை.! வந்துவிட்டது இ-சிம் தொழிநுட்பம்.

இந்த வாரத்தின் சிறப்பு தகவல் – இனி கைபேசிகளுக்கு சிம் கார்டே தேவையில்லை;

அதாவது எப்படி வேலை செய்கிறது இந்த இ-சிம்?

தற்போது நாம் பரவலாக பயன்படுத்திவரும் சிம் கார்டுகள் கடந்த 1991ஆம் ஆண்டு அறிமுகப்படுத்தப்பட்டு பல்வேறு வடிவமைப்பு மாற்றங்களுக்கு பிறகு நனோ என்ற மிகச்சிறிய அளவிற்கு வந்தடைந்துள்ளது.

உங்களது கைபேசிக்கென்று கொடுக்கப்பட்டுள்ள குண்டூசி போன்ற பொருளை பயன்படுத்தி சிம் கார்டு வைக்கும் டிரேவை கவனமாக திறந்து, மிகச் சிறிய பகுதியில் சிம் கார்டு கீழே விழாமல் உள்ளே வைப்பதற்கு சிரமப்படுபவரா நீங்கள்? அதற்கு மாற்று ஏதாவது உள்ளதா என்று நீங்கள் நினைத்ததுண்டா? இதுவரை நினைத்ததில்லை என்றால் இனியும் நினைக்காதீர்கள்! ஏனெனில் அப்படி ஒரு மாற்று பயன்பாட்டுக்கே வந்துவிட்டது.

சாதாரண சிம் கார்டு பயன்பாட்டு முறைக்கு முடிவுக்கட்டும் இ-சிம் தொழில்நுட்பத்தை ஆப்பிள் உள்ளிட்ட முன்னணி திறன்பேசி தயாரிப்பாளர்கள் பயன்படுத்த தொடங்கியுள்ளனர். வருங்காலத்தில் உற்பத்தி செய்யப்படும் திறன்பேசிகளில் சிம் கார்டே இல்லாமல் பயன்படுத்தும் நிலை உருவாகலாம்.

இந்நிலையில், பிபிசி தமிழின் வாராந்திர தொழில்நுட்ப தொடரின் சிறப்பு பகுதியில் இந்த வாரம் இ-சிம் என்றால் என்ன? அது எவ்வாறு வேலை செய்கிறது? அதன் சிறப்பம்சம் என்ன? போன்ற அடிப்படை கேள்விகளுக்கு பதிலளிக்கிறோம்.

இ-சிம் கார்டு என்றால் என்ன?

அடிப்படையில் இ-சிம் என்பதும் ஒருவகை சிம் கார்டுதான். ஆனால், ஏற்கனவே திறன்பேசியின் மதர்போர்டில் பொருத்தப்பட்டிருக்கும் அந்த சிம் கார்டை நீங்கள் வெளியே எடுக்கவோ, மாற்றவோ முடியாது. அதாவது, நீங்கள் அந்த திறன்பேசியை வாங்குவதற்கு முன்னரே அதனுள் சிம் கார்டு பொருத்தப்பட்டிருக்கும்.

இ-சிம் கார்டுக்கான தேவை என்ன?

“என்னுடைய புதிய கைபேசியில் மிகப் பெரிய எட்ஜ்-டு-எட்ஜ் திரை இருக்க வேண்டும், நல்ல சத்தம் வேண்டும், பல சென்சார்கள் இருக்க வேண்டும், இரண்டுக்கும் மேற்பட்ட அதிநவீன கேமெராக்களையும் சிறந்த பிளாஷ் லைட்டையும், இரண்டு சிம் கார்டுகளை போடக்கூடியதாகவும் இருக்க வேண்டும்” என்று நாம் தினந்தினம் கைபேசியின் மீதான எதிர்பார்ப்பை அதிகப்படுத்த, அதிகப்படுத்த ஆராய்ச்சியாளர்கள் ஒரு கைபேசியிலிருந்து எதையெல்லாம் நீக்கினால் வேறொரு சிறப்பம்சத்தை கூட்டலாம் என்று நினைத்து அடுத்தடுத்து செய்த படிநிலை மாற்றங்களின் விளைவுதான் இது.

சுருங்க சொன்னால், கையளவு உள்ள கைபேசியில் அதிக இடத்தை அடைக்கும்/ வடிவமைப்பை சிக்கலாக்கும் பழமையான சிம் கார்டுக்கான இடத்தை குறைப்பதற்காக உருவாக்கப்பட்டதே இ-சிம்!

இது எப்படி வேலை செய்கிறது?

மேலே குறிப்பிட்டப்பட்டதை போன்று, உங்களது கைபேசியின் உள்ளேயே இ-சிம் அமைக்கப்பட்டிருக்கும். உதாரணத்துக்கு ஐபோனின் புதிய வரவான ஐபோன் 10 எஸ், எஸ் மேக்ஸை எடுத்துக்கொள்வோம். இந்த இரண்டு ஐபோன்களிலுமே முதல் சிம் சாதாரண நானோ சிம், இரண்டாவது இ-சிம். நீங்கள் சாதாரண சிம்மை அமைத்த பிறகோ அல்லது அமைக்காமலோ கூட இ-சிம்மை நிறுவ முடியும்.

அதாவது, ஐபோனிலுள்ள செட்டிங்ஸ் > செல்லுலார் > அட் செல்லுலார் பிளான் வரை வந்துவிட்டு உங்களது கைபேசி அழைப்பு வசதி அளிக்கும் நிறுவனம் வழங்கிய தாளில் உள்ள க்யூஆர் கோடை ஸ்கேன் செய்து, அடுத்து கேட்கும் கன்பர்மேஷன் எண்ணை பதிவிட்டவுடன் உங்களது பழைய கைபேசி எண், திட்டம் என அனைத்துமே உடனடியாக வந்துவிடும்.

மாறாக, உங்களது தொலைத்தொடர்பு சேவை நிறுவனத்தின் பிரத்யேக செயலியின் மூலமும் இதை நிறுவலாம் என்கிறது அப்பிள் நிறுவனம்.

இ-சிம்மின் சிறப்பம்சங்கள் என்னென்ன?

1.முதலாவதாக கைபேசி தயாரிப்பாளர்களுக்கு இடத்தை அடைக்கும் சாதாரண சிம் கார்டிலிருந்து விடுதலை கிடைக்கிறது. இதன் மூலம் வடிவமைப்பில் கவனம் செலுத்த முடியுமென்று தயாரிப்பாளர்கள் நம்புகின்றனர்.

2.சாதாரண சிம் கார்டுகளை போன்று அடிக்கடி தேய்ந்து போகும் பிரச்சனையோ, தொழில்நுட்ப பிரச்சனைகளோ இதில் இல்லை.

3.குறிப்பாக, அடிக்கடி பல்வேறு தொலைத்தொடர்பு நிறுவனங்களுக்கு தன்னுடைய எண்ணை மாற்றுபவர்களுக்கும், உலகின் பல்வேறு நாடுகளுக்கு பயணம் செய்பவர்களும் உடனுக்குடன் சிம் கார்டை மாற்றாமலேயே எண்ணையும், நிறுவனத்தையும் மாற்றிக்கொள்ளமுடியும் என்பது வரப்பிரசாதமாக அமையும்.

இலங்கையில் இதை பயன்படுத்த முடியுமா?

அமெரிக்காவிலுள்ள முன்னணி தொலைத்தொடர்பு சேவை நிறுவனங்கள் இ-சிம் கார்டுகளை வழங்க ஆரம்பித்துள்ளன. இலங்கையை பொறுத்தவரை தற்பொழுது டயலொக் மற்றும் மொபிடெல் ஆகிய இரண்டு நிறுவனங்கள் மட்டும்தான் இந்த இ-சிம் வசதியை அளிக்கின்றன. வருங்காலத்தில் இ-சிம் பொதிக்கப்பட்ட திறன்பேசிகளின் வருகை பெருகினால் மற்ற நிறுவனங்களும் இ-சிம்முக்கு ஆதரவு வழங்கும்.

சீனாவிலுள்ள ஒரு தொலைத்தொடர்பு நிறுவனம் கூட இ-சிம் வசதியை வழங்கவில்லை என்பதால் அந்நாட்டில் மட்டும் இரண்டு சாதாரண சிம் கார்டுகளை பொறுத்தக்கூடிய ஐபோன்கள் விற்கப்படுமென்று அப்பிள் நிறுவனம் அறிவித்துள்ளது என்பது குறிப்பிடத்தக்கது.

மேலும் இது போன்ற பயனுள்ள தகவல்களை உடனுக்குடன் பார்வையிட எமது முகநூல் பக்கத்தை (Facebook Page) லைக் செய்யவும்.[wpdevart_like_box profile_id=”1865134133798752″ connections=”show” width=”600″ height=”200″ header=”large” cover_photo=”show” locale=”en_US”]